Португали ҳукумати хорижликлар инвестиция ўрнига яшаш учун рухсат олиши мумкин бўлган Golden Visa Portugal дастурини ёпишга қарор қилди. Бу ҳақда ҳукумат йиғилишидан кейин Португалия бош вазири Антониу Кошта маълум қилди, деб хабар беради Publico.

Унинг сўзларига кўра, ҳукумат амалдаги «олтин визалар» муддатини агарда инвестициялар инвестор ёки унинг авлодларининг доимий яшаш жойларига ёки кўчмас мулк узоқ муддатли ижарага берилса узайтиради.

2012 йилнинг октябридан 2023 йил январга қадар Португалия 11 628 та «олтин виза» берган бўлиб, уларнинг 10 668 таси умумий миқдори 6 миллиард евродан ошадиган турар жой бинолари харидига ажратилган. Дастур доирасида энг кўп яшаш ҳуқуқини Хитой (5258), Бразилия (1178) ва АҚШ (558) фуқаролари қўлга киритган.

Португалия ҳукумати 2022 йил 26 февралдан, Украинага қарши кенг кўламли уруш бошланганидан икки кун ўтганидан бошлаб Россия фуқароларига «олтин визалар» беришни тўхтатган. Ўша вақтга қадар бундай визаларни 431 нафар Россия фуқароси олишга улгурганди, жумладан, уларнинг етти нафари 2022 йил бошида қўлга киритган.

Аввалроқ Бирлашган Араб Амирликлари янги турдаги «яшил» визаларни жорий қилиши маълум бўлганди. «Яшил» визалар новаторлар, тадбиркорлар ва бошқа қимматли кадрлар учун мамлакатда ишлаш ва яшаш учун рухсатномалар бўлади. Шунингдек, бундай виза эгалари 25 ёшга тўлгунга қадар ўғил фарзандларига ҳомийлик қилишлари мумкин бўлади (илгари мамлакатда ўғил болаларга 18 ёшгача ҳомийлик қилиш мумкин бўлган).