Япония ғарбидаги Вакаяма шаҳрида бош вазир Фумио Кисида нутқ сўзлаётган жой яқинида портлаш содир бўлди, деб хабар бермоқда NHK ва Kyodo.

Портлаш Кисида ҳукмрон Либерал-демократик партия номзоди билан гаплашаётган ва Сайгасаки балиқ овлаш портида нутқ сўзлашга тайёрланаётган пайтда содир бўлган.

ОАВ маълумотларига кўра, ушбу жойга тўпланган оломон орасидан тутунли бомбага ўхшаш нарса улоқтирилган. Портлашдан кейин воқеа жойи тутай бошлаган.

Полиция ҳодисада ҳеч ким жабрланмаганини айтди. Кисида портлаш жойидан эвакуация қилинган. Кейинчалик у яна учта режалаштирилган кўча чиқишларини ўтказишга қарор қилган.

Қайд этилишича, 24 ёшли гумонланувчи воқеа жойида қўлга олинган. Япония телеканаллари томонидан олинган кадрларга кўра, бу у бош вазир томонга тутунли бомба улоқтиргандан сўнг дарҳол содир бўлган. Бунинг сабаблари ҳозирча номаълум.

Эслатиб ўтамиз, 2022 йил июл ойида Япониянинг собиқ бош вазири Синдзо Абэ Нара шаҳрида сайловолди митингида нутқ сўзлаётган вақтда отиб ўлдирилган эди. У ўзига келмай касалхонада вафот этган.