Марокашда кеча, 8 сентябр куни кечқурун 6,8 магнитудали кучли зилзила содир бўлди. Бу ҳақда CNN хабар берди.

Қайд этилишича, ер қимирлаши Марокашнинг Юқори Атлас тоғ тизмасида маҳаллий вақт билан 23:00 дан кейин содир бўлган. Зилзила ўчоғи 850 минг аҳоли истиқомат қилувчи тарихий Марракеш шаҳридан 72 километр жануби-ғарбда, 18,5 километр чуқурликда қайд этилган.

Марокаш Ички ишлар вазирлиги хабарига кўра, ҳодиса оқибатида камида 296 киши ҳалок бўлган, 153 киши жароҳат олган. Кўплаб марокашликлар афтершок кузатилиши мумкинлиги хавотири сабаб тунни бир неча шаҳарлардаги кўчаларда ўтказган. Мамлакат махсус хизматлари вайроналар остида қолганларни қидириш миссияси бошланганини эълон қилди. Соғлиқни сақлаш вазирлиги эса одамларни ярадорларга ёрдам бериш учун қон топширишга чақирди.

Зилзила XII асрда қурилган ва қарийб минг йиллик тарихга эга бўлган Марракеш шаҳрига ҳам жиддий зарар етказган, тарихий қалъанинг бир қисми қулаб тушган.

Маълумот учун ушбу шаҳар Марокашнинг тўртта энг йирик иқтисодий марказидан бири ҳисобланади. 2019 йилда 3 миллионга яқин сайёҳ унга ташриф буюрган.