Исроил-Фаластин ўртасидаги можаролар туфайли ҳар иккала томондан 2000 дан ортиқ киши ҳалок бўлган. Бу ҳақда Исроил ташқи ишлар вазирлиги хабар берди.

Унга кўра, Исроилда ҳозиргача 900 дан ортиқ одам ҳалок бўлган. Исроил кучларининг Ғазога қарши ҳужумлари натижасида эса 700 дан ортиқ одам қурбон бўлган.

Бундан ташқари, дунёнинг 20 дан ортиқ давлатларининг фуқаролари бедaрак йўқолган, баъзи хорижий фуқаролар ўғирлаб кетилган. Жумладан:

1) Аргентиналик 7 киши қурбон бўлган, 15 киши бедарак йўқолган. Мамлакатнинг 625 нафар фуқароси эса ўз ватанига қайтишни сўраб мурожаат қилган.

2) Таиланд – 18 киши қурбон ва 9 киши ярадор бўлган, 11 киши эса гаровга олинган. Олдинроқ мамлакатнинг қурбонлари сони 12 нафар эди. Уч минг нафар одам эса ўз мамлакатига қайтишни сўраган.

3) АҚШ –11 киши ҳалок бўлган.

4) Австрия – мамлакатнинг Австрия-Исроил фуқаролиги остидаги уч нафар фуқароси ўғирлаб кетилган.

5) Бразилия – тўқнашувлар бошланган пайтда мусиқа фестивалига ташриф буюрган Бразилия-Исроил фуқароси бўлган уч нафар киши бедарак йўқолган.

6) Камбоджа – ушбу давлатнинг Исроилдаги бир нафар талаба бўлган фуқароси ўлдирилган.

7) Канада – бир киши ҳалок бўлган, уч нафари эса бедарак йўқолган.

8) Чили – Исроилнинг Ғазо билан чегарасидан унчалик узоқ бўлмаган жойда яшаган чилилик икки нафар эр-хотин йўқолган.

9) Колумбия – ушбу мамлакатдан бўлган икки киши ҳам фестивалда иштирок этган ва можаролар бошланган пайтда бедарак йўқолган.

10) Франция – икки киши ҳалок бўлган, 14 нафари эса бедарак йўқолган.

11) Германия – Германия-Исроил фуқаролиги бўлган бир неча киши гаровга олинган. Аммо уларнинг сони очиқланмаган.

12) Ирландия – тўқнашувлар сабабли ушбу давлатдан бўлган бир нафар аёл ном-нишонсиз йўқолиб қолган.

13) Италия – италияликларнинг икки нафари бедарак йўқолган.

14) Мексика – Исроилда яшаётган мексикалик бир эркак ва бир аёл жангарилар томонидан гаров сифатида асирга олинган.

15) Непал – Осиёнинг ушбу давлатига мансуб бўлган Исроилдаги 10 киши ҳалок бўлган. Бир нафари эса бедарак йўқолган.

16) Панама – тўқнашувлар давомида бир нафар Панама фуқароси ҳам йўқолган.

17) Парагвай – бу мамлакатдан икки киши бедарак йўқолган.

18) Перу – Жанубий Америка давлатларидан бири ҳисобланган бу давлатнинг Исроилда икки нафар фуқароси йўқолгани маълум бўлган.

19) Филиппин – филиппинлик бўлган етти нафар киши можаролар давом этаётган пайтда бедарак йўқолган.

20) Россия – мамлакатнинг Тел-Авивдаги элчихонаси томонидан Исроил ташқи ишлар вазирлигига берилган маълумотларига кўра, бир нафар россиялик ҳалок бўлган. Тўрт киши бедарак йўқолган.

21) Танзания – Танзаниянинг Исроилдаги элчиси мамлакатнинг икки нафар фуқароси бедарак йўқолганини айтиб ўтган.

22) Украина – Исроил ТИВга кўра, Исроилда бир неча йил яшаб келган икки нафар украиналик аёл ўлдирилган.

23) Буюк Британия – Фаластин-Исроил можаролари давомоида британиялик бир киши ўдирилган, яна бир нафари номаълум сабаб билан бедарак йўқолган.

Эслатиб ўтамиз, аввалроқ Ўзбекистон Ташқи ишлар вазирлиги Исроил-Фаластин можароси юзасидан расмий баёнот берганди. Шундан сўнг, Исроил-Фаластин можаросида Ўзбекистон фуқаролари асирга олингани ҳақидаги хабарлар тарқалиб, бунга Ўзбекистоннинг Исроилдаги элчихонаси расмий муносабат билдирганди. Шунингдек, элчихона ушбу мамлакатдан Ўзбекистонга кетиш истагида бўлганлар бемалол авиачипта олиб учишлари мумкинлиги, авиарейслар бекор қилинмаганини маълум қилганди.

Маълумот учун, олти кундан буён ҲАМАСнинг Исроил шаҳарларига ҳужуми давом этмоқда. Ўз навбатида, Исроил ҳам Ғазони тўлиқ блокада қилиш, ушбу ҳудудни барча таъминот воситаларидан узиб қўйишини эълон қилди ҳамда сектордаги бир қанча ҳудудларга зарбалар берди. Кейинчалик ҲАМАС Исроилга қарши «Ал-Ақсо тўфони» ҳарбий операцияси бошлаганини эълон қилди. Исроил Мудофаа кучлари эса бунга жавобан «Темир қиличлар» аксилтеррор операциясини бошлади. Уруш туфайли кўплаб бегуноҳ одамлар қурбон бўлган. Исроилда ҳалок бўлганларнинг ярмига яқини аёллар ва болалардир.