Хориждаги нашрларининг хабар беришича, Исроилнинг миллий хавфсизлик вазири Итамар Бен-Гвир Туркия президенти Ражаб Тоййиб Эрдўғондан Фаластиннинг ҲАМАС тарафдорларини Туркияга олиб кетишни сўраган.

«Мен Эрдўғон ва унинг халқи бизнинг болаларимизни, қарияларимизни ва аёлларимизни ўлдирган, талон-тарож қилган ва зўрлаган нацист қотилларни қўллаб-қувватлаётганини кўрмоқдаман. Шунинг учун, Эрдўғондан уларни ўз ҳимоясига олишни сўрамоқчиман» деб ёзган Бен-Гвир ўзининг Х ижтимоий тармоғи (собиқ Twitter)даги саҳифасида.

Эрдўғон Истанбулда Фаластинни қўллаб-қувватлаш учун ўтказилган митингда Анқара Исроилни «ҳарбий жиноятчи» деб эълон қилиб, буни бутун халқаро ҳамжамият олдида Фаластин-Исроил можаросининг ёмонлашуви муносабати билан амалга оширишини айтган. Шунингдек у, «ҲАМАС ҳаракати террорчи ташкилот эмас» деган фикрни илгари сурган.

Шундан сўнг, Исроил ташқи ишлар вазири Эли Коен икки томонлама муносабатларни қайта кўриб чиқиш учун Туркиядан барча элчиларини зудлик билан чақириб олишини айтган. Бундан ташқари, Туркиядаги Исроил элчихонаси ўзининг Х ижтимоий тармоғидаги саҳифасида «ҲАМАС террорчи ташкилотдир» деган суратни туркча ёзув билан жойлаштирган.

Эслатиб ўтамиз, аввалроқ ҲАМАС ҳаракати анча олдин араб ва ислом давлатларини Исроил элчиларини чиқариб юборишга ва бу давлат билан муносабатларни нормаллаштиришнинг барча шаклларини тўхтатишга чақирганди. Туркия эса Исроил билан энергия бўйича барча шартномаларни тўхтатиб, мамлакат президенти Исроилга ташрифини ҳам бекор қилганди. Сал ўтиб, Исроил Ғазога қуруқликдаги ҳужумини бошлади. Эрдўғон эса Туркия аҳолисини Исроилга қарши митингга чақирди.