Ташқи меҳнат миграцияси агентлиги Ўзбекистоннинг Россияда меҳнат қилаётган аҳолисини норасмий курерлик хизматларида ишламаслик тўғрисида огоҳлантирди. Бу ҳақда агентлик матбуот хизмати хабар берди.

Унда охирги пайтларда курерлик хизматларида наркотик ёки тақиқланган моддалар солинган буюртмаларни етказиб бериш таклиф қилинаётганлиги, бунинг оқибатида улар полиция ходимлари томонидан ушланиб, жиноий жавобгарликка тортилиш ҳолатлари кучайгани айтиб ўтилган.

«Сўнгги вақтларда Россияда ишлаётган юртдошларимиз орасида интернет орқали катта пул эвазига маҳсулотларни бир манзилдан иккинчи манзилга етказиб бериш ҳақидаги эълонлар бўйича муаммолар юзага келмоқда. Мурожаатлардан маълум бўлмоқдаки, норасмий курерлик хизматларида наркотик ёки тақиқланган моддалар солинган буюртмаларни етказиб бериш (закладка) таклиф қилинмоқда ва бунинг оқибатида полиция ходимлари томонидан улар ушланиб, жиноий жавобгарликка тортилмоқда. Шу муносабат билан, юртдошларимиздан норасмий курерлик хизматларида ишламасликни, катта миқдордаги пул эвазига шубҳали буюмларни бир манзилдан иккинчи манзилга етказиб бермасликни ёки маҳсулотни албатта текширишларини сўраймиз» дейилган агентлик хабарида.

Агентлик шунингдек, Россия Федерацияси қонунчилигига кўра, наркотик моддаларни сотиш ёки етказиб бериш учун узоқ муддатли қамоқ жазоси белгиланганлигини эслатиб ўтган.

Эслатиб ўтамиз, агентлик Россиядаги ўзбекистонликларни бу бўйича аввал ҳам огоҳлантирганди.