Шавкат Мирзиёев Тошкентда ўтаётган Иқтисодий ҳамкорлик ташкилоти саммити доирасида 9 ноябр куни Эрон президенти Иброҳим Раисий ва Тожикистон президенти Эмомали Раҳмон билан учрашиб, музокара ўтказган. Бу ҳақда Президент матбуот хизмати хабар берди.

Учрашувда Ўзбекистон-Эрон муносабатларини янада мустаҳкамлаш, савдо, инвестициялар, инновациялар ва транспорт соҳаларида амалий ҳамкорликни кенгайтириш масалалари муҳокама қилинган.

Ўзбекистон ва Эрон раҳбарлари маданий-гуманитар ва илм-фан соҳасидаги алмашинувларни ривожлантириш муҳимлигини кўрсатиб ўтган ва минтақавий аҳамиятга молик масалалар, жумладан, Афғонистондаги бугунги вазият нуқтаи назаридан кўриб чиқилган.

Шавкат Мирзиёев Тожикистон президенти Эмомали Раҳмон билан икки мамлакат ўртасидаги яхши қўшничилик, стратегик шериклик ва иттифоқчилик муносабатларини янада мустаҳкамлаш масалаларини муҳокама қилган.

Шунингдек, ўзаро савдони кўпайтириш, машинасозлик, энергетика, электротехника, тўқимачилик ва бошқа тармоқларда кооперация лойиҳаларини илгари суриш бўйича, шу жумладан, ҳукуматлараро комиссия фаолияти доирасида мувофиқлашган ишларни давом эттириш муҳимлиги Тожикистон президенти билан ўтган музокараларда қайд этилган.

Шунингдек, Ўзбекистон ва Тожикистон раҳбарлари  келажакдаги тадбирлар режасини ҳам кўриб чиққан.

Аввалроқ, Шавкат Мирзиёев Ражаб Тоййиб Эрдўғон билан учрашгани хабар қилинганди.