Хориждаги нашрларнинг ёзишича, АҚШда америкалик шифокорлар дунёдаги биринчи муваффақиятли кўз трансплантациясини амалга оширишган. Аммо тиббиёт ходимлари беморнинг кўра олиш ёки олмаслиги ҳақида ҳеч нарса айтишмаган.

Ушбу операция арканзаслик 46 ёшли собиқ ҳарбий хизматчи Аарон Жеймсда ўтказилган. Унинг кўзлари кўрмай қолишига юқори вольтли электр токи уриши сабаб бўлган. Яъни, 2021 йилда унинг юзига 7200 вольтлик ток урган. Ҳодиса натижасида у юзининг чап томони, жумладан, кўзи, шунингдек, бурни ва оғзидан шикаст олган.

21 соат давом этган операцияни 140 дан ортиқ жарроҳ, ҳамшира ва фельдшерлар амалга оширишган. Мамлакатдаги Лагон тиббиёт марказининг пресс-релизига кўра, кўчириб ўтказилган кўзда саломатлик белгилари жуда яхши бўлган.

«Бизнинг биринчи муваффақиятли бутун кўз трансплантациясини юз билан амалга оширганимиз жуда катта ютуқдир. Биз олдинга катта қадам ташладик ва кўриш қобилиятини тиклаш учун кейинги бобга йўл очдик» деган жамоанинг етакчи жарроҳларидан бири доктор Эдуардо Родригес.

Бемор эса ўзида бундай жарроҳлик амалиётини ўтказилганидан хурсанд бўлган ҳамда келгуси синовларга ҳам тайёр эканлигини таъкидлаган.

«Агар мен оламни кўра олсам — бу жуда яхши. Бироқ кўра олмасамда ушбу ишлар тиббиёт соҳасидаги кейинги йўлларни бошлаб берса, мен бундан жуда мамнунман ва галдаги синовларга ҳам тайёрман» деган Жеймс.

Маълумот учун, беморга донор қилинган юз ва кўз 30 ёшли битта эркак донордан олинган. Жарроҳлик пайтида шифокорлар донорнинг суяк илигидан кўриш нервига унинг тикланишини рағбатлантириш учун каттароқ илдиз ҳужайраларини киритишган.

Эслатиб ўтамиз, аввалроқ Ўзбекистонда илк бор робот-жарроҳ ёрдамида мураккаб амалиёт ўтказилгани, бундай операцияни биринчилардан бўлиб АҚШ 2000 йилда ўтказгани ҳақда хабар берилганди.