Вазирлар Маҳкамасининг қарори асосида ишлаб чиқилган «Таълим ташкилотлари битирувчилари баҳоларининг ўртача кўрсаткичини ҳисоблаш ва уни олий таълим ташкилотларига кириш имтиҳонларида инобатга олиш тартиби тўғрисида»ги Низомга кўра, мактаб битирувчиларининг шаҳодатномасидаги 11 йиллик таълимнинг сўнгги 6 йиллик баҳолари ОТМга киришдаги балга қўшилади. Баҳолар электрон платформалар орқали ҳисобланади ва ДТМнинг ABITUR дастурига юборилади.

Баҳоларнинг ўртача кўрсатгичи 6-11-синфлардаги ёки 6-9-синфлар ва 1-2-босқичлардаги йиллик баҳоларнинг умумий йиғиндисини ўқитилган фанларга бўлиш орқали чиқарилади.

Максимал балл 100 фоиз деб олинади ва баллар баҳо тизимига қуйидагича ўтказилади:

▫️86–100 % учун – 5 баҳо;
▫️71–85 % – 4 баҳо;
▫️56–70 % – 3 баҳо;
▫️56 % гача – 2 баҳо.

Маълумот учун, 2023 йилда мактабларни 390 мингдан ортиқ ўқувчи тугатди. Уларнинг сони ўтган йилги битирувчилар сони билан деярли тенг. Билим ва малакаларни баҳолаш агентлиги маълумотига кўра, бу йилги қабулда 1 млн 260 минг абитуриент ҳужжат топшириши кутиляпти.