Андижон вилоятининг Асака туманида иккита турмуш ўртоғи бор бўлган эркакка суд ҳукми ўқиб эшиттирилди. Bugun.uz’даги мавжуд маълумотларга кўра, 52 ёшли Абдулла Абдуллаевнинг қонуний рафиқаси С.Абдуллаевадан уч нафар фарзанди бор. Шунингдек, эркакнинг К.С. исмли шаръий никоҳдаги аёли ҳам бор бўлган.

Эркакнинг биринчи аёли эрининг бошқа хотини борлигини билиб қолгач, Абдуллаев иккала хотинини ҳам битта рўзғорда яшатишга қарор қилган ва унинг қонуний рафиқаси ҳам бунга рози бўлган. Бу орада шаръий никоҳдаги аёл ҳам ҳомиладор бўлган.

Бироқ, шундан сўнг оилада турли жанжаллар юзага келган. Абдуллаевнинг айтишича, у биринчи аёлини хиёнатда айблаган, хотини эса эрининг бошқа биров билан оила қуриб эътиборсиз бўлиб қолганини иддао қилган.

Ҳолат юзасидан шу йилнинг 3 октябр куни бўлиб ўтган жиноят ишлари бўйича Асака туман судининг ҳукмига кўра, эркак иш ҳақининг 20 фоизини давлат даромадига ушлаб қолган ҳолда, уч йил ахлоқ тузатиш ишлари жазосига ҳукм қилинган. Bugun.uz’га қўшимча қилинишича, ҳозирда эркак рафиқаларидан бири билан ажрашган.