Андижондаги «Яшил боғ»га Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов вазирлик ва вазирликнинг вилоят бошқармаси ходимлари билан бирга дарахт кўчатлари ўтқазди. Бу ҳақда Экология, атроф-муҳитни муҳофаза қилиш ва иқлим ўзгариши матбуот хизмати хабар берди.

«Яшил боғ» ҳудуди 15 гектардан иборат бўлиб, 5 000 та дарахт экилди. Андижон вилоятида жами 36,1 гектар майдонда «Яшил боғ»лар ташкил қилинган. Боғларда каталпа, ясин, акация, клён, шарқ туяси, садақайрағоч, сурия атиргули, каштан, шумтол, павлония каби 12 000 га яқин кўчатлар ўтқазилган.

Бундан ташқари, «Янги Андижон» массивидаги 1 гектар майдонда «Экология вазирлиги боғи» ҳам ташкил қилинмоқда. Таъкидлаш жоизки, кўчатларни парваришлашда томчилатиб суғориш усулидан фойдаланилади. Бундан мақсад самарадорликка эришиш ва сувдан фойдаланишда исрофгарчиликка йўл қўймасликдир.