Перудаги қадимий Чан-Чан шаҳрида археологлар 25 кишининг жасади қолдиқларини топди. Бу ҳақда «Daily Mail» хабар берди.

Маълум қилинишича, жасадлар ўтирган ҳолатда аниқланиб, улар пахта, ва ўсимлик матосига ўралган бўлган. Улар билан бирга қабрдан 50 та сопол буюмлар ҳам топилган. Мутахассисларнинг фикрича, қабр Колумбгача бўлган Чиму маданияти элитаси вакилларининг дафн этилган жойи бўлиши мумкин. Қолдиқларнинг аксарияти 30 ёшгача бўлган ёш аёлларга тегишли ҳисобланади.

Археолог Хорхе Менесес Бартранинг сўзларига кўра, бу бўйича тадқиқот олиб борилади ва уларнинг ўлими сабаби аниқланади. Скелетлардан бирининг ҳолати олимларга одам ўлимидан кўп ўтмай дафн этилганини аниқлашга имкон берган. Бироқ бошқа суяклар бир-бирига аралашган ҳолда аниқлангани учун, эҳтимол жасадлар кейинроқ дафн қилинган жойга кўчирилгани айтилган. Скелетлар 10 квадрат метрлик кичик майдонда топилган.

Аввалроқ Туркияда қадимги юнон худолари ҳайкалларининг боши топилгани ва археологлар Римда қуллар яшаган уйни аниқлагани маълум қилинганди.