13:26 | 07.11.21
Бу муҳим кашфиёт экани таъкидланган
Археологлар қадимги Рим шаҳри Помпейда қуллар яшаган уйни аниқлади. Бу ҳақда «The Guardian» хабар берди.
Маълум қилинишича, қуллар яшаган хона 16 квадрат метр бўлиб, у ерда учта ёғоч каравот, мато ва металл буюмлар солинган сандиқ аниқланган. Археологларнинг фикрига кўра, турар-жой эгасининг вилласида ишлаётган оила яшашига мўлжалланган. Каравот остидан шахсий буюмларни сақлаш учун амфоралар ва сопол кўзалар ҳам топилган.
Таъкидланишича, каравотлар арқонлар билан ўралган тахталардан ясалган. Топилмалардан бири бошқалардан кичикроқ бўлиб, олимлар у бола учун мўлжалланганини айтган. Хонадаги ягона ёруғлик манбаи тепада жойлашган кичик тирқиш бўлган. Уйнинг деворларида ҳеч қандай безак қайд этилмаган.
«Бу ажойиб кашфиёт бўлиб, деярли элита одамлари томонидан ёзилган тарихий манбаларда кам учрайдиган одамларнинг ҳақиқий ҳаётини акс эттиради», — дейди Помпей археологик боғи директори Габриэль Зухтригель.
Шунингдек, у мазкур кашфиёт унинг фаолиятидаги энг ҳаяжонли ва буюк кашфиётлардан бири эканини қайд этган.
Аввалроқ олимлар сайёрадаги энг сирли объектлардан бири бўлган Стоунхенжда тадқиқот ўтказгани ва Мисрда фиръавн хазиначисининг қабри топилгани маълум қилинган.
Мавзуга доир хабарлар билан танишинг: