2023 йилнинг 14 июн куни Қашқадарё вилояти Экология ва атроф-муҳитни муҳофаза қилиш ва иқлим ўзгариши бошқармаси ҳамда Касби тумани ИИБ ходимлари ҳамкорлигида Касби туманида браконерликка қарши курашиш мақсадида назорат тадбири ўтказилди.

Тадбирида «Касби» МФЙ, Обод маҳалла кўчасида яшовчи фуқаро M.И. яшаш хонадонида Ўзбекистон Республикаси Қизил китоби ҳамда «CITES» конвенциясининг 1-иловасига киритилган бўз эчкиэмарларни тутқунликда сақлаб, уларни ваҳшийларча нобуд қилаётгани аниқланди. Тезкор тадбирда 20 та эчкиэмарнинг тутқунликда сақланаётгани ва 43 та эчкиэмар ўлдирилиб, териси шилиб олингани маълум бўлди.

Мазкур ҳолат бўйича тегишли тартибда ҳужжатлар расмийлаштирилиб, фуқаро M.И.дан 20 та тирик эчкиэмар ва 43 та эчкиэмарнинг териси ашёвий далил сифатида олиб қўйилди.

Ҳолат бўйича:

• Ўзбекистон Республикаси «Экологик назорат тўғрисида»ги Қонуннинг 25-моддаси;
• «Табиатни муҳофаза қилиш тўғрисида»ги Қонуннинг 47, 49, 50-моддалари;
• «Ҳайвонот дунёсини муҳофаза қилиш ва ундан фойдаланиш тўғрисида»ги Қонуннинг 51, 53-моддалари;
• Жиноят кодексининг 202-моддаси;
• Вазирлар Маҳкамаси «Ҳайвонот дунёси объектларидан фойдаланиш ва ҳайвонот дунёси объектларидан фойдаланиш соҳасида рухсат бериш тартиб таомилларидан ўтиш тартиби тўғрисида»ги Низомининг 6-боб, 126-банди талабларига асосан ҳуқуқбузарга ҳайвонот дунёсига етказилган жами 311 миллион 850 минг сўм зарар ҳисобланиб, ҳужжатлар ҳуқуқни муҳофаза қилиш органларига тақдим этилди.

Тирик қолган 20 та бўз эчкиэмар ўзининг яшаш муҳити бўлган Муборак туманидаги чўл ҳудудларига қўйиб юборилди.