Аввалроқ, Исроил ташқи ишлар вазирлиги Исроил-Фаластин можаросида қайси давлатларнинг фуқаролари ҳалок бўлганини очиқлаганди.

Исроил ва ҲАМАС ўртасидаги ҳарбий можароларда ҳалок бўлган болалар сони биргина Ғазо секторида икки мингдан ошди. Бу ҳақда Save the Children халқаро хайрия ташкилоти хабар берди.

Айтилишича, Ғарбий Соҳилда яна 27 нафар бола ҳалок бўлган. Жабрланган болалар сони эса 4,6 мингдан ошган.

«Бундай кичик ва зич жойлашган ҳудудда рўй бераётган можаро, жумладан доимий ҳаво ҳужумлари тинч аҳоли қурбонларининг ҳайратланарли даражада кўпайишига олиб келади» дейилган ташкилотнинг Х ижтимоий тармоғидаги баёнотида.

Хайрия ташкилотининг қайд этишича, Ғазо секторидаги ҳужумлар натижасида минглаб уйлар, ўнлаб ўйин майдончалари, мактаблар, касалхоналар, черковлар ва масжидлар вайрон бўлган.

«Жабрланган болалар аччиқ куйишлар олдилар, оёқ-қўлларини йўқотдилар ва бошқа даҳшатли жароҳатларнинг оғриқларини бошдан кечиришмоқда» дея қўшимча қилинган баёнотда.

Save the Children ташкилотининг Фаластиндаги директори Жейсон Ли томонларни болаларнинг ҳаётини ҳимоя қилиш учун зудлик билан чоралар кўришга ва халқаро ҳамжамиятни эса бу саъй-ҳаракатларни қўллаб-қувватлашга чақирган.

Маълумот учун, Исроил ва ҲАМАС ўртасидаги ҳарбий ҳаракатлар шу йилнинг 7 октябридан бери давом этмоқда. Ҳарбий ҳаракатлар бўлаётган Ғазо сектори аҳолисининг ярмини болалар ташкил этади. БМТ агентликлари Ғазо секторидаги ҳалокатли вазиятни қайд этиб боришмоқда. Унга кўра, aнклавда 5,1 минг киши ҳалок бўлган, 15,3 минг киши жароҳатланган. Ғарбий Соҳилда эса 95 киши ҳалок бўлган ва 1,7 минг киши жароҳатланган. Исроилда 1,4 минг киши ҳалок бўлган ва 5,4 минг киши жароҳат олган.