Баҳрайн парламентининг қуйи палатаси ҳисобланган депутатлар палатаси ўз баёнотида, ҳукумат Исроилнинг Ғазо секторидаги ҳаракатлари фонида Фаластин халқини қўллаб-қувватлаш учун Исроилдаги элчисини чақириб олишга ва яҳудий давлати билан иқтисодий алоқаларни тўхтатишга қарор қилганини айтган.

«Депутатлар палатаси Исроилнинг Баҳрайндаги элчиси қиролликни тарк этганини тасдиқлади. Баҳрайн ҳам қиролликнинг Тел-Авивдаги элчисини мамлакатга қайтаришга қарор қилди. Шунингдек, Исроил билан иқтисодий алоқалар ҳам тўхтатилди» дейилган ҳукумат сайтида.

Мамлакатнинг қонун чиқарувчи органига кўра, бу қарор Баҳрайннинг Фаластин масаласи ва фаластинликларнинг қонуний ҳуқуқларини қўллаб-қувватлаш бўйича тарихий ва қатъий позициясини яна бир бор тасдиқлашни англатади.

Маълумот учун, 2020 йилнинг сентябр ойида Вашингтонда Исроил расмийлари АҚШ воситачилигида Бирлашган Араб Амирликлари ва Баҳрайн билан муносабатларни нормаллаштириш бўйича ҳужжатларни имзолаган. Уч томонлама битим Иброҳим келишуви деб номланганди. Кейинчалик, Судан ва Марокаш Исроил билан муносабатларни нормаллаштиришни эълон қилган. БАА ва Баҳрайн билан сулҳ тузишдан олдин Исроил араб давлатлари орасида фақат Миср ва Иордания билан дипломатик муносабатларга эга бўлган.

Эслатиб ўтамиз, аввалроқ Исроил Ғазога қуруқликдаги ҳужумини бошлаганди. БМТ эса Ғазода ўт очишни тўхтатиш бўйича резолюция лойиҳасини қабул қилганди. Аммо АҚШ ва Исроил бунга қарши чиққанди. Кейинчалик, Исроилнинг Ғазо қуруқликларидаги урушида АҚШнинг беш минг аскари иштирок этгани маълум бўлди. Бундан ташқари, Исроил Туркия президенти Эрдўғондан ҲАМАС тарафдорларини Туркияга олиб кетишни сўраганди. У эса Исроил билан энергия бўйича барча шартномаларни тўхтатиб, мамлакатга ташрифини бекор қилганди. Сал ўтиб, ҲАМАС’нинг Шимолий Ғазодаги юқори мартабали қўмондони ўлдирилганди.