Жаҳоннинг етакчи телеканали BBC World News томонидан бутун дунё сайёҳларининг катта аудиториясини ўзида жам қилган The Travel Show ҳафталик теледастури орқали Ўзбекистоннинг туризм салоҳиятига бағишланган махсус кўрсатувлар тез орада эфирга узатилиши маълум қилинди.

Дунё бўйлаб 200 дан ортиқ мамлакатлар ва ҳудудларда жами 450 миллиондан ортиқ кузатувчига эга BBC World News телекомпанияси билан Маданият ва туризм вазирлиги ҳамкорлигида телекўрсатув лойиҳаси амалга оширилилмоқда. Унга кўра, The Travel Show ҳафталик теледастури доирасида Ўзбекистонга бағишланган 23 дақиқалик махсус телекўрсатув оммага ҳавола этилиши режалаштирилган.

Шу кунларда, BBC World News телеканали эфирларида реклама сифатида 2 ва 4 дақиқалик модуллар (Ўзбекистон ҳақидаги тўлиқ теледастурдан парчалар) намойиши бошланиши билдирилди.

Бундан ташқари телеканалнинг ижтимоий тармоқлардаги саҳифалари орқали Ўзбекистон ҳақидаги The Travel Show дастури махсус сонининг тарғиботи амалга оширилмоқда.

Телеканалда Ўзбекистон ҳақида тўлиқ метражли 23 дақиқалик махсус кўрсатув премьерадан ташқари 4 ой давомида такроран 4 маротаба эфирга чиқиши белгиланганди.

Мазкур телекомпания томонидан Travel Show Uzbekistan Special кўрсатуви ҳам тайёрланган бўлиб, кўрсатув давомида томошабинлар учун Ўзбекистон бўйича қимматли маълумотлар тақдим этилади.

Шунингдек, BBC Travel’нинг ижтимоий тармоқларида Ўзбекистон ҳақидаги Travel Show дастурининг махсус сони эфирга узатилишидан аввал доимий равишда тарғиб қилинади.

Дастур материаллари билан онлайн видео парчалар BBC Travel Show дастури саҳифасида, BBC News онлайн ва BBC Reel’да эфирга узатилиши маълум қилинди.