Беларусь президенти Александр Лукашенко 8 та хорижий мамлакат элчиларидан ишонч ёрлиқларини қабул қилди. Бу ҳақда «БелТА»га таяниб, ЎзА хабар берди.

Қайд этилишича, давлат раҳбарига ишонч ёрлиқларини Ўзбекистон, Озарбайжон, Қирғизистон, Туркия, Япония, Непал, Ўмон ва Гвинея элчилари топширди. Анъанага кўра, етакчи ҳар бир элчи билан давлатлар ўртасидаги шериклик ҳолатига қисқача тўхталди.

«Беларусь учун Ўзбекистон билан кенг қамровли ҳамкорлик ниҳоятда муҳим аҳамиятга эга», – деди президент Минскда фаолият бошлаган фавқулодда ва мухтор элчи Раҳматилла Назаровдан ишонч ёрлиғини қабул қилар экан.

Александр Лукашенко яқинда Тошкентда бўлиб ўтган самимий қабул, мулоқот учун Ўзбекистон Президенти Шавкат Мирзиёевга чуқур миннатдорлик билдирди.

«Ишончим комилки, сиз, элчи жаноблари, Беларусда ишлаган ва мамлакатимизни яхши билган инсон сифатида олий даражада эришилган келишувларни амалга оширишда бор имкониятларни, икки томонлама алоқани мустаҳкамлаш учун билим ва тажрибангизни ишга соласиз», – дейди у.