Бугун, 16 октябр куни Исроил Ташқи ишлар вазирлиги бутун дунё бўйлаб 41 та мамлакатнинг фуқаролари, жумладан ўзбекистонлик уч нафар фуқаро мамлакатдаги ҲАМАС билан тўқнашувларда ҳалок бўлгани ҳақида хабар берди. Ўзбекистоннинг Исроилдаги элчихонаси ушбу хабар юзасидан расмий муносабат билдирди.

Қайд этилишича, мамлакат жанубида рўй берган тўқнашувлар вақтида Ўзбекистонда туғилган ва ўтган аср 90 йилларида репатриация дастурига мувофиқ Исроилга кўчиб келган 5 нафар шахс ҳалок бўлган. Олинган маълумотларга кўра, улар амалдаги Ўзбекистон фуқаролик паспортларига эга эмас.

«Юқоридагиларни эътиборга олиб, ОАВни кузатиб борувчи фуқароларда бўлиб ўтаётган воқеалар кўлами ва уруш ҳаракатлари ҳақида нотўғри қарашлар пайдо бўлишининг олдини олиш мақсадида маълумотларни чоп этишдан олдин, уларни ишончли манбалардан, шу жумладан, Ўзбекистон Республикасининг Исроилдаги элчихонаси орқали қайта текширишингизни сўраймиз», дейилади хабарда.

Эслатиб ўтамиз, бундан аввал Исроилдаги Ўзбекистон элчихонаси мамлакат фуқароларининг куч билан ушлаб турилгани ҳақидаги хабарларга ҳам раддия берган эди. Шунингдек, ўтган аср 90 йилларида Исроилга кўчиб кетган ўзбекистонлик эркак тўқнашувлар вақтида ҳалок бўлгани хабар қилинганди.