Бош прокуратура блогер Фарҳод Манноповнинг ўлими билан боғлиқ қўшимча маълумот берди
Чилонзор тумани прокуратураси томонидан унинг ўлими билан боғлиқ жиноят иши юзасидан тергов ҳаракатлари давом эттирилмоқда
MittiVine тахаллуси билан танилган вайнер Фарҳод Маннопов 5 март куни Тошкентнинг Чилонзор туманида жойлашган клиникалардан бирида вафот этгани тўғрисида хабар берилганди. Бош прокуратура Чилонзор тумани прокуратураси томонидан унинг ўлими билан боғлиқ жиноят иши юзасидан тергов ҳаракатлари давом эттирилаётганини маълум қилди.
Қайд этилишича, тергов давомида жарроҳлик амалиётини ўтказган клиника шифокорлари, анестезиолог ҳамда марҳумнинг танишлари, шунингдек, жами 15 нафар шахс гувоҳ тариқасида сўроқ қилинган.
Шу билан бирга, жиноят иши бўйича Соғлиқни сақлаш вазирлигига тайинланган хизмат текшируви хулосаси олиниб, жиноят иши ҳужжатларига қўшилган.
Бундан ташқари, жиноят иши доирасида мураккаб экспертизаларни ўтказиш жараёни кетмоқда.
Дастлаб олиб борилган тезкор суриштирув ишлари давомида 2013 йилда ушбу клиникада яна бир шахс жарроҳлик амалиёти вақтида вафот этганлиги ҳақида кўрсатма олинган.
Бироқ тергов давомида ушбу важ ўз тасдиғини топмагани сабабли жиноят иши Жиноят кодексининг 116-моддаси 4-қисми «а» бандидан 116-моддаси 3-қисмига қайта малакаланган.
Барча зарур тергов ҳаракатлари ўтказилганидан сўнг иш бўйича қонуний тўхтамга келинади.
Мавзуга доир: «Ўпка, жигар, буйрак ва юракни уч марта ишдан чиқариб кейин бизга хабар қилишган» — Mitti.me
Маълумот учун, MittiVine тахаллуси билан ижод қилиб келган таниқли вайнер Фарҳод Маннопов бассейнда бошидан ва бурнидан жароҳат олиб, операция қилинган. Аммо операциядан сўнг комага тушиб, ўзига келмай 5 мартга ўтар кечаси вафот этган. Бош прокуратура томонидан блогернинг вафоти юзасидан Жиноят кодексининг 116-моддаси (касб юзасидан ўз вазифаларини лозим даражада бажармаслик) билан жиноят иши қўзғатилган.
