Судланувчининг адвокати таҳририят билан боғланиб, мазкур иш аппеляция инстанциясида кўриб чиқилаётгани, ҳозирда шифокор қамоқдан уйига қайтгани ва унга нисбатан тилхат кўринишидаги эҳтиёт чораси қўлланилганини маълум қилди. Шунингдек, у ишнинг якуний натижаси бўйича маълумот беришини билдирди.

Bugun.uz маълумотларига кўра, 2022 йилнинг октябрида Вобкент ТТБга 36 хафталик ҳомила билан ташриф буюрган аёлда кесарча кесиш амалиёти ўтказилган.

Орадан маълум вақт ўтгач, аёл иситмаси тушмаётганидан шикоят қилиб яна ТТБга келган. Иситмани тушириш учун қилинган амаллар бефойда кетгач, аёл Бухоро шаҳридаги шифохоналарнинг бирида текширувлардан ўтган ва унда бачадоннинг йиринглаб кетгани аниқланиб, операция йўли билан бачадон олиб ташланган.

Бундан ташқари, организмда йиринг тарқалиб, аёлнинг буйракларига ҳам шикаст етгани аниқланган.

Кейинчалик, аёл унда кесарча кесиш амалиётини ўтказган гинеколог Ҳ.Ш.нинг устидан шикоят қилгани боис унга нисбатан жиноят иши очилиб, иш судга оширилган.

Судда аёл омадсиз жарроҳлик амалиёти сабабли соғлиғини йўқотиб, яна 4 марта операция бўлишига тўғри келганини билдириб, суддан гинекологга нисбатан қамоқ билан боғлиқ жазо беришни сўраган.

Судланувчи Ҳ.Ш.га кўра, беморга нисбатан барча муолажалар тўғри бажарилган, кесарчадан олдин аёл буйрак яллиғланиши ва қизилча билан оғриган, шунинг учун унда септик асоратлар юзага келган бўлиши мумкин.

Суд экспертиза хулосаси, касаллик тарихи ва бошқа материалларни ўрганиб чиқиб шифокорни Жиноят Кодексининг 116-моддаси яъни касб юзасидан ўз вазифаларини лозим даражада бажармасликда айбли деб топган ва унга нисбатан 3 йил муддатга гинеколог шифокор лавозимида ишлаш ҳуқуқидан маҳрум қилинган ҳолда 2 йил озодликдан маҳрум қилиш жазосини тайинлаган.