Украина Ўзбекистоннинг «Фотон» компаниясига қарши санкциялар қўллади. Мамлакат президенти Владимир Зеленский 181 жисмоний ва 185 юридик шахс, жумладан Ўзбекистоннинг «Фотон» электроника заводи ва унинг директори Марифхўжа Саидумаровнинг активларини 10 йил муддатга чекловчи фармонни имзолаган.

Келтирилишича, ушбу чекловлар активларни музлатиш ва савдони «блокировка» қилишни қамраб олади.

Бундан ташқари, Буюк Британия республиканинг «Мвизион» компаниясига санкция киритган. Ушбу компания Россияга эҳтиёт қисмларини етказиб беришда воситачилик қилгани қайд этилган.

Санкциялар рўйхатига ҳарбий техника ва эҳтиёт қисмлар етказиб берувчи жами 46 та жисмоний ва юридик шахслар киритилган.

Маълумот учун, «Мвизион» компанияси 2022 йил июн ойида рўйхатдан ўтган бўлиб, электрон ва телекоммуникация ускуналари етказиб бериш билан шуғулланади.

Аввалроқ, Зеленский Ўзбекистоннинг икки фуқароси ва компанияларига 10 йиллик санкция жорий этгани ҳақда хабар берилганди.