Кучли чанг бўрони, кўриш масофасининг 500 метргача пасайиши сабабли «Бухоро» аэропортида соат 11:40 гача ҳаво кемаларини қабул қилишда вақтинчалик чекловлар жорий этилди. Бу ҳақда Uzbekistan Airports хабар берди.

Шу муносабат билан Uzbekistan Airways авиакомпаниясининг Тошкент-Бухоро йўналиши бўйича HY21 рейси маҳаллий вақт билан соат 08:56 да Навоий шаҳридаги муқобил аэродромга қўнган. Йўловчилар ер усти транспортида Бухорога етказилган.

Шунингдек, бугунги HY285/286 рейслари ўзгартирилган жадвал ва йўналиш бўйича амалга оширилади:

• HY285 Навоий – Истанбул, жўнаш маҳаллий вақт билан соат 13:00 да.
• HY286 Истанбул – Бухоро, жўнаш маҳаллий вақт билан соат 19:15 да, Бухорога етиб келиш 23:25 да.
• HY22 Бухоро – Тошкент, жўнаш маҳаллий вақт билан соат 00:01 да, Тошкентга етиб келиш соат 01:00 га режалаштирилмоқда.

Эслатиб ўтамиз, аввалроқ «Ню-Йорк – Тошкент» самолёти Россияга фавқулодда қўнишга мажбур бўлгани хабар қилинганди.