Фарғона вилоятининг Қўқон шаҳрида яшовчи фуқаро тадбиркор сифатида давлат рўйхатидан ўтмасдан, шаҳарда жойлашган хонадонларнинг бирида криптовалюта ишлаб чиқаришни мақсад қилади. У электр таъминоти корхонаси билан шартнома тузмасдан, умумий қуввати 104,2 килоВатт/соат бўлган 31 дона «Ватсмайнер М21С» қурилмалари ва 2,16 килоВатт/соат бўлган вентилятор ва ёритгичлар, жами қуввати 106,3 килоВатт/соат бўлган электр қурилмаларини ўзбошимчалик билан электр тармоғига улаган.

Натижада 2020 йилдан 2023 йилга қадар мазкур шахс жами 2 млн. 794 минг 100 килоВатт электр энергиясидан фойдаланиб, электр таъминоти корхонасининг 12 млрд. 369 млн. сўмлик мулкини яширин равишда талон-тарож қилгани аниқланган.

Эслатиб ўтамиз, аввалроқ Сурхондарёда майнинг крипто-активлари қурилмаларини ўрнатган хонадон аниқлангани хабар қилинганди. Хонадон эгаси давлат ва жамият манфаатларига 425,7 млн сўм зарар етказганди.