Давлат хавфсизлик хизмати Ўзбекистоннинг қатор вилоятларида тезкор тадбирлар ўтказиб, фарзандини сотмоқчи бўлган аёлларни ушлади.

Маълум бўлишича, хавфсизлик хизматининг Сирдарё вилояти бўйича бошқармаси ходимлари томонидан Бош прокуратура ҳузуридаги Департамент ва вилоят ички ишлар бошқармаси билан ҳамкорликда Гулистон шаҳрида тезкор тадбирўтказилган. Унда 33 ёшли аёл Бухоро вилоятида туғилган, Гулистон шаҳрида вақтинча яшовчи аёл 30 январь куни туғилган ўғил фарзандини 40 минг АҚШ долларига сотган вақтида ашёвий далиллар билан ушланди.

Сурхондарё вилоятида кузатилган ҳолатда эса Термиз туманида яшовчи, 31 ёшли аёл 25 январь куни туғилган қиз фарзандини ўзининг жиноий шериги билан тил бириктириб, Термиз шаҳрида 25 миллион сўмга сотган вақтида Давлат хавфсизлик хизмати ҳамда Ички ишлар органлари ходимлари томонидан ушланди.

Давлат хавфсизлик хизматининг Тошкент шаҳар бўйича бошқармаси ходимлари томонидан Бош прокуратура ҳузуридаги Департамент билан ҳамкорликда ўтказилган тезкор тадбирда, Чирчиқ шаҳрида яшовчи, 27 ёшли аёл ўзининг 2018 йилда туғилган ўғлини Тошкент шаҳрида 3 минг АҚШ долларига сотган вақтида ашёвий далиллар билан қўлга олинди.

Шунингдек, Наманган шаҳрида яшовчи, 29 ёшли аёл ўзининг 2014 йилда туғилган ўғлини 18 минг АҚШ долларига сотишга келишиб, талаб қилинган пулдан 4 минг АҚШ долларини олган вақтида Давлат хавфсизлик хизмати ҳамда ички ишлар органлари ходимлари томонидан ушланди.

Ҳозирда барча ҳолатлар юзасидан мазкур шахсларга нисбатан Жиноят кодексининг 135-моддаси 3-қисми банди билан жиноят ишлари қўзғатилиб, тергов ҳаракатлари олиб борилмоқда.