Манҳэттен суди АҚШнинг собиқ президенти Доналд Трампга нисбатан жиноий айблов эълон қилди. У мамлакат тарихида судда расман айбланган биринчи собиқ ёки амалдаги давлат раҳбари бўлди.

CNN хабар беришича, 4 апрел куни Трамп Манҳэттен округи прокуратурасига келган ва у стандарт ҳуқуқий тартиблардан ўтиш учун расман ҳибсга олинди.

Судга кетаётиб, Трамп ўзининг Truth Social саҳифасида шундай ёзди: «Бу қандайдир сюрреаллистик воқеа — вау, улар мени ҳибсга олишмоқчи. Мен Америкада бу содир бўлаётганига ишонмайман».

Собиқ президентнинг кўплаб тарафдорлари ва унга қаршилар суд биноси олдида тўпланган. Оқ уй Трампнинг ҳибсга олиниши кутилаётгани муносабати билан юзага келиши мумкин бўлган тартибсизликларга тайёр эканини айтди, бироқ суд жараёни АҚШнинг амалдаги президенти Жо Байденнинг эътиборини тортадиган масала эмаслигини қўшимча қилди.

Прокуратурага келганидан сўнг Трампдан бармоқ излари олинган, бироқ унинг қўлига кишан тақилмаган. Шундан сўнг у адвокатлар билан бирга судга келган, унга айбловнинг 34 та банди ўқиб эшиттирилган. Трамп уларнинг ҳеч бирида айбини тан олмаслигини айтди. Судя собиқ президентга нисбатан эҳтиёт чорасини танламади, шундан сўнг у суд биносини тарк этди.

Манҳэттен прокуратураси эълон қилган айблов хулосасига кўра, Доналд Трамп 2016 йилги президентлик сайловлари шаффофлигига путур етказиш мақсадида фитна уюштирган. Прокурорларга кўра, у ўзининг сайловолди кампаниясига салбий таъсир ўтказиши мумкин бўлган маълумотларни яшириш бўйича ноқонуний режага шерик бўлган.

Хусусан, Трамп президентликка номзод сифатида кўрсатилган даврда у билан жинсий алоқада бўлгани ҳақидаги маълумотларни сайловдан олдин ошкор қилмасликка рози бўлган порноактриса Сторми Дэниэлсга (ҳақиқий исми Стефани Клиффордс) 130 минг доллар тўлаганликда айбланмоқда. Пулни актрисага Трампнинг адвокати Майкл Коэн ўтказган, кейин эса Trump Organization ва унинг раҳбаридан пулни қайтариб олган. 2018 йилда Коэн бу иш бўйича аллақачон уч йиллик қамоқ жазосига ҳукм қилинган эди.

Айблов хулосасида айтилишича, Трамп Коэнга Дэниэлсга тўловни имкон қадар кечиктиришни ва умуман тўламаслик учун сайлов охиригача кутишни кўрсатган, чунки улардан кейин воқеа оммага ошкор бўлса ҳам аҳамиятини йўқотади. Сторми Дэниэлс судда гувоҳлик бериши кутилмоқда.

Қайд этилганидек, барча айбловлар Трамп ташкилотининг 2017 йилдаги молиявий ҳисоботларига тегишли. Прокурорларга кўра, Трамп ўз компаниясининг бизнес ҳужжатларига бир неча бор сохта ёзувлар киритган.

«Ҳар бир чек Trump Organization томонидан қайта ишланган ва ҳар бир чек келишувга мувофиқ 2017 йилнинг маълум бир ойида амалга оширилган юридик хизматлар учун тўлов сифатида кўрсатилган. Тўлов ёзувлари сохта эди. Аслида, ҳеч қандай келишув бўлмаган ва адвокатга 2017 йилда кўрсатилган юридик хизматлар учун ҳақ тўланмаган», дейилади хабарда.

Трампнинг адвокати Тодд Бланш учрашувдан сўнг мижозининг «ҳафсаласи пир бўлганини» ва «хафа бўлганини» айтди. Ҳимоячининг фикрича, собиқ президент сиёсий таъқибга учрамоқда.

Трампга қўйилган барча айбловлар E тоифадаги жиноятлар бўлиб, Ню-Йорк штатидаги энг паст жиноят ҳисобланади. Трамп ҳар бир ҳисоб учун тўрт йилгача қамоқ жазосига ҳукм қилиниши мумкин.

Иш бўйича навбатдаги суд мажлиси 4 декабр куни Ню-Йоркда бўлиб ўтиши режалаштирилган.