Дубайда номаълум жиноий тўда томонидан гаровда ушлаб турилган ўзбекистонлик Ж.Т. Ўзбекистоннинг Дубайдаги Бош консуллиги кўмагида қутқарилди, деб хабар бермоқда «Дунё».

Бош консулликга жабрланувчининг яқин қариндошлари орқали мурожаат йўлланган бўлиб, Ж.Т. бир гуруҳ шахслар томонидан Дубай шаҳридаги номаълум манзилда мажбурий тарзда ушлаб турилгани билдирилган. Ундан жами 200 минг АҚШ доллари пул талаб қилинган. Ушбу маблағлар айтилган вақтда ва манзилга келтирилмаган тақдирда Ж.Т.нинг жонига қасд қилиш билан қўрқитиб келинган.

Бирлашган Араб Амирликларининг ҳуқуқни муҳофаза қилувчи идоралари билан биргаликда амалга оширилган тадбир натижасида Ж.Т. ушлаб турилган манзил аниқланган ва озодликка чиқарилган.

Ҳозирги кунда ушбу жиноий гуруҳ аъзоларининг аксарияти БАА ҳуқуқни муҳофаза қилувчи идоралари томонидан ушланган ва уларга нисбатан тергов-суриштирув ишлари олиб борилмоқда.