Расмий ташриф билан Ўзбекистонда бўлиб турган Франция президенти Эммануэл Макрон ўзининг X (Twitter) саҳифасида ўзбек тилида пост қолдирди.

Макрон Самарқандга кўплаб француз компаниялари ҳамроҳлигида Ўзбекистон ва Франция ўртасидаги ҳамкорлик салоҳиятини намойиш қилиш учун келганини таъкидлаган.

«Ўзбекистон билан иқтисодий алоқаларимиз чинакам юксалиб бормоқда. Бугун биз уларни келажакни кўзда тутиб янада кучайтира оляпмиз», деб ёзади у.

Макрон назарда тутган француз компанияларининг раҳбарлари бугун, 2 ноябр куни ташрифнинг ишбилармонлик дастури доирасида ташкил этилган қўшма бизнес форумида Президент Шавкат Мирзиёев билан учрашди. Жумладан, Франциянинг Orano, EDF, Semmaris, Meridiame, Lactalis, Boehringer Ingelheim, компаниялари раҳбарлари Шавкат Мирзиёевнинг қабулида бўлди.

Маълумот учун, Эммануэл Макрон Қозоғистонга ташрифи давомида ўзининг Х саҳифасига қозоқ тилида ҳам пост жойлаганди. Франция раҳбари унда асосан дунёда айни пайтда давом этаётган геосиёсий жараёнларга эътибор қаратган.

«Суперкучлар яна ҳукмронликка интилаётган ва баъзилари олдиндан айтиб бўлмайдиган ҳаракатларни содир этишга уриниши мумкин бўлган дунёда янги истиқболларни биргаликда қура оладиган шериклар ва дўстларга ишониш муҳимдир. Улар орасида Қозоғистон ва Франция ҳам бор», деб ёзади у.