Туркия президенти Ражаб Тоййиб Эрдўғон мамлакат аҳолисини Фаластинни қўллаб-қувватлаш учун митингга таклиф қилганди.

«Сизларни Фаластин ва биродарлар билан бирдамлигимизни бутун дунёга кўрсатадиган Буюк Фаластин митингига таклиф қиламан. Бирдамлигимизни бутун дунёга яна бир бор кўрсатишимиз лозим» дея ўз халқига мурожаат қилганди Эрдўғон.

Туркия нашрларининг хабар беришича, президентнинг митингга йиғилганлар билан учрашуви жонли тарзда оммавий ахборот воситаларида намойиш этилмоқда. Митингга икки миллионга яқин одам йиғилган.

Рафиқаси билан ташриф буюрган Туркия раҳбари Фаластин байроғи рангидаги шарф билан кўриниш берган. Митинг Қуръон тиловати ва дуо билан бошланган. Президент Эрдўғон унда нутқ сўзлаб, аҳолига юзланган.

«Ғазо учун қалбимиз оловини дунёга сочамиз. Уфқимиз қаерга чўзилган бўлмасин, қалби ва кўзини бизга қаратган биродарларимиз ва опа-сингилларимиз учун доимо қайғурамиз. Биз бу ерда нафақат Ғазо, балки ўз мустақиллигимиз ва келажагимизни ҳам ҳимоя қилмоқдамиз. Исроил раҳбарларининг сўзларини эшитсангиз, сиз уларнинг мамлакатимиз чегараларини қамраб олган хиёнат режаларини кўрасиз» деган Эрдўғон.

Туркия раҳбари митингда дунё аҳолисининг бепарволиги ҳақида ҳам гапириб ўтган.

«Кеча Украина-Россия урушида тинч аҳоли учун кўз ёшларини тўкканлар бугун минглаб бегуноҳ болаларнинг ўлимини жимгина кузатиб туришибди. Биз эса Ливия ва Қорабоғ учун қандай муносабатда бўлсак, Яқин Шарққа ҳам шундай муносабатдамиз» деган у.

Маълумот учун, ҲАМАС ҳаракати анча олдин араб ва ислом давлатларини Исроил элчиларини чиқариб юборишга ва бу давлат билан муносабатларни нормаллаштиришнинг барча шаклларини тўхтатишга чақирганди.

Ушбу сўралган ёрдамга жавобан Туркия Исроил билан энергия бўйича барча шартномаларни тўхтатган. Ҳатто, Эрдўғон Исроилга ташрифини ҳам бекор қилганди.