Туркия нашрлари берган хабарларга кўра, мамлакат президенти Ражаб Тоййиб Эрдўғон Исроилнинг Ғазо секторида Фаластиннинг ҲАМАС ҳаракати билан ҳарбий можароси вақтидаги ҳаракатларини танқид қилган.

У Туркия парламентидаги ўз партияси фракциясида сўзлаган нутқида Ғарб Исроилдан қарздорлиги сабабли ҲАМАСни террорчи ташкилот, деб билиши, аммо Туркиянинг Исроилдан қарзи йўқлигини айтган.

«Ҳамас террорчи ташкилот эмас, бу ўз ерларини ҳимоя қилаётган мужоҳидлар гуруҳи», – дейди у.

Эрдўғон, шунингдек, унинг Исроилга режалаштирилган ташрифи «ғайриинсоний уруш» туфайли бекор қилинганини ҳам маълум қилган.

«Исроилга ташриф дастурим бор эди, уни бекор қилдим, ташриф амалга оширилмайди» деган Ражаб Тоййиб Эрдўғон.

Эрдўғоннинг айтишича, Туркия Исроил билан муносабатларни ниҳоят нормаллаштириш ниятида бўлган. Аммо, Исроил Туркиянинг яхши ниятини суиистеъмол қилган.

Эслатиб ўтамиз, аввалроқ Исроил БМТ бош котибининг зудлик билан истеъфога чиқишини талаб қилганлиги ҳақда хабар берилганди.