Эроннинг амалдаги президенти Ҳасан Руҳоний мамлакатда коронавируснинг бешинчи тўлқини бошланиши мумкинлигини маълум қилди. Бу ҳақда «Associated Press» хабар берди.

Унинг сўзларига кўра, бунга мамлакатда хасталикнинг «дельта» штаммини юқтириб олиш билан боғлиқ ҳолатларнинг кўпайиши сабаб бўлиши мумкин.

«Мамлакат бўйлаб пандемиянинг бешинчи тўлқини кузатилиши мумкинлигидан хавотирдамиз», — дея маълум қилган Руҳоний бунинг олдини олиш учун мамлакат чегараларида, айниқса, шарқий қисмда қатъий назорат ўрнатишни талаб қилган ҳолда. 

Маълумотларга кўра, Эронда 3,2 миллиондан ортиқ одам касалликни юқтириб олган, 84 мингдан ортиқ киши у сабаб ҳалок бўлган. Эрон Соғлиқни сақлаш вазирлиги пойтахт Теҳрон ва яна тўққизта шаҳарни «қизил» тоифага киритган. Қайд этилишича, чет эл фирмаларига пул ўтказишни қийинлаштираётган АҚШ санкциялари остида қолган Эрон 83 миллион аҳолиси учун вакциналарни олиб кириш борасида ҳам қийинчиликларга дуч келмоқда.

Маълумот ўрнида, Ҳасан Руҳоний мамлакат президенти сифатида охирги иш ҳафталарини ўтказмоқда. Август ойида унинг ўрнини мамлакат суд тизимининг собиқ раҳбари Иброҳим Раисий эгаллайди.

Аввалроқ Эроннинг янги президенти Байден билан учрашмаслигини айтганди. Шунингдек, Эрон Ташқи ишлар вазирлиги вакили Америка армиясининг ҳаракатларини қоралаганди.