Фарғона ва Самарқанд вилоятларида акциз тамаки маҳсулотларини муомалага киритилишининг олди олинган.

Бош прокуратура ҳузуридаги департаментнинг Қўқон шаҳар бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Натижада фуқаролар И.К, М.К. ва бошқалар «Сунбула» МФЙ ҳудудидаги иккита хонадонда акциз маркасиз тамаки маҳсулотларини сақлаш учун «яма» ташкил этиб, умумий баҳоси 720 миллион сўмлик 25 хил турдаги жами 52 970 қути хорижий давлатларда ишлаб чиқарилган тамаки маҳсулотларини ўтказиш мақсадида сақлаб келганликлари аниқланган ва ушбу тамаки маҳсулотлари ашёвий далил сифатида олинган.

Шунингдек, Самарқанд вилояти Тайлоқ туманида ҳам шунга ўхшаш ҳолат кузатилган. Туман бўлими томонидан божхона ва ИИБ ходимлари билан ҳамкорликда ўтказилган тезкор тадбирда фуқаро Ш.С. ва Д.Т. хорижда ишлаб чиқарилган 2 000 қути Esse Change номли акциз маркасиз тамаки маҳсулотини фуқаро Г.К.га 3 660 АҚШ долларига сотган вақтида ушланиб, тадбир якунида Ш.С.нинг хонадонидан сотиш мақсадида сақлаб келинган жами 2 410 қути тамаки маҳсулоти ашёвий далил сифатида олинган.

Аввалроқ, Самарқандда қиймати 560,2 миллион сўмлик қалбаки акциз маркали алкоголь маҳсулотлар борлиги аниқланганди.