Ўзбекистон Халқ демократик партиясининг XIII қурултойида президентликка номзодни тасдиқлади. Бу ҳақда партия ахборот маркази хабар берди.

Жорий йилнинг 29 май куни Тошкент шаҳрида партия қурултойи ўтказилди. Унда партия аъзолари ва ОАВ вакиллари иштирок этди. Қурултой кун тартибида Ўзбекистон президентлигига номзод кўрсатиш ва номзоднинг дастури тўғрисидаги масалалар кўриб чиқилди.

Қурултойда Халқ демократик партиясидан Ўзбекистон президентлигига номзод кўрсатиш тўғрисидаги масала атрофлича муҳокама қилинди. Партия Марказий Кенгашининг жорий йил 12 май куни бўлиб ўтган пленумида партия Марказий Кенгаши раиси, Олий Мажлис Қонунчилик палатаси Спикери ўринбосари Улуғбек Илясович Иноятов номзодини илгари суриш ҳақида қарор қабул қилинган эди.

Шундан сўнг, Сайлов кодексига мувофиқ, партиянинг ваколатли вакили Ўзбекистон Президенти сайловида иштирок этишга ижозат сўраб Марказий сайлов комиссиясига ҳужжатларни топширди. Ҳужжатларни ўрганиб чиққан Марказий сайлов комиссияси ЎзХДПнинг 2023 йил 9 июль куни бўлиб ўтадиган Президент сайловида иштирок этишини тасдиқлади.

Сўзга чиққан партия фаоллари Улуғбек Иноятов номзодини қўллаб-қувватлади. Номзод масаласи бўйича муҳокамалардан сўнг, Президент сайловида Халқ демократик партиясидан Улуғбек Илясович Иноятовни номзод сифатида кўрсатиш ҳақида қарор қабул қилинди.

Шунингдек, номзоднинг Дастури тўғрисидаги масала ҳам атрофлича муҳокама қилинди.

Номзод дастуридан Ўзбекистондаги ижтимоий адолат, ижтимоий тенглик ва халқ ҳокимиятчилиги мезонларига мос келадиган демократик ижтимоий давлатни барпо этиш каби масалалар ўрин олган.