Давлат хавфсизлик хизмати ходимлари Хоразмда Миллий гвардия маркази бошлиғи, Тошкентда адвокат ва Бухорода «ИИБ ходими»ни пора билан ушлади. УзАнинг хабар беришича, Тошкентда ўтказилган тезкор тадбир давомида адвокатлик бюроси адвокати фирибгарлик йўли билан фуқародан беш минг доллар олаётган вақтида ушланган.

Аниқланишича, адвокат ўзининг Олий судда ишловчи танишлари орқали фуқаролик ишлари бўйича Мирзо Улуғбек туманлараро судининг 2023 йил октябр ойидаги ҳал қилув қарорини суднинг аппелляция инстанцияси жараёнида судланувчи фойдасига ўзгаришсиз қолдириш масаласини ҳал қилиб беришн ваъда қилган.

Бухорода эса ўзини ички ишлар ходими, деб таништирган шахс фуқародан унинг танишига нисбатан Жиноят кодексининг 273-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан қўзғатилган жиноят иши доирасида уни ҳибсхонадан чиқариш ва унга нисбатан юритилган жиноят ишини ҳаракатдан тугатишни ҳал қилиб бериш эвазига 10 минг доллар талаб қилган. Шу мақсадда олдиндан икки минг долларни олаётган пайтда эса қўлга олинган.

Шунингдек, яна бир ҳолатда Хоразмда ўтказилган тезкор тадбирда Миллий Гвардия Хоразм вилояти Қўриқлаш бошқармаси Шовот тумани қўриқлаш бўлими техник қўриқлаш маркази бошлиғи фирибгарлик йўли билан 1400 АҚШ доллари ҳамда 1,2 миллион сўмни олаётган вақтида ушланган.

Аниқланишича, у маҳаллий фуқарони Миллий Гвардия тизимига ишга жойлаштириб қўйишни ваъда қилган.

Эслатиб ўтамиз, аввалроқ Тошкент вилояти Зангиота туманидаги «Бек Барака» бозори директорининг ўринбосари таниши орқали янги типда қурилган дўконни олиб беришни ваъда қилиб, фуқародан 20 минг доллар олаётган пайтда ушлангани ҳақида хабар берилганди.