Хоразмдаги мактаблардан бирида ўқитувчи ўқувчини калтаклади
Мазкур ҳолат Болалар омбудсмани назоратига олинган.
2023 йил 30 октябр куни Хоразм вилоятининг Боғот туманидаги 2-ихтисослаштирилган умумтаълим муассасаси ўқитувчиси Қ.Ҳ. ўқувчи М.Б.ни калтаклаган.
Маълумотларга кўра, тарих фани ўқитувчиси 9-синф ўқувчисини қайта-қайта огоҳлантиришига қарамасдан дарс машғулотига тайёргарликсиз келганлиги учун калтаклаган. Ҳозирда мактаб ходими билан тузилган меҳнат шартномаси унинг хоҳишига кўра бекор қилинган.
Шунингдек, ушбу воқеа Болалар омбудсмани томонидан ўрганилмоқда.
«Ўқитувчи томонидан болага нисбатан бундай номаъқул муомалада бўлиши, уни уриши, таҳқирлашига ҳеч бир ҳолатда мутлақо йўл қўйиб бўлмайди. Бу борада боланинг манфаатларини ҳимоя қилиш юзасидан зарур бўлган барча чоралар кўрилади.» – дейилади Болалар ҳуқуқлари бўйича вакил (Болалар омбудсмани) расмий баёнотида.
Мазкур ҳолат бўйича Боғот тумани ички ишлар бўлими томонидан терговга қадар текширув тайинланган.
