Қашқадарё вилояти, Чироқчи тумани, «Яшнобод» маҳалласи ҳудудига 2023 йилнинг 5 апрел куни Қизил китобга киритилган қўнғир айиқ тушиб келгани хабар қилинганди. Табиат ресурслари вазирлиги мазкур ҳолатга муносабат билдирди.

Қайд этилишича, шу куни тахминан соат 23:00 ларда айиқ Қумдарёга яқин жойдаги жарликда ҳосил бўлган ғор ичига кириб олган. Бир оздан сўнг бу ерда маҳаллий аҳоли тўпланган.

Маҳаллий ҳокимлик вакилларидан иборат ишчи гуруҳ томонидан ўз вақтида тегишли чора-тадбирлар кўрилмагани боис айиқ безовталаниб, жарликдан тепага чиқишга уринган. Чироқчи тумани ИИБ бошлиғи А.Б. атрофга йиғилган аҳоли хавфсизлигини таъминлаш мақсадида овчи Д.А.га айиққа ўқ узишга кўрсатма берган. Оқибатда айиқнинг жони узилган.

Тошкент ҳайвонот боғи вакиллари ҳодиса жойига етиб борганида айиқ нобуд бўлган эди.

«Мазкур ҳолат ўрганилиши давом этмоқда. Масъулиятсизликка йўл қўйган ва бунинг оқибатида қўнғир айиқнинг ўлимига сабаб бўлган масъулларга нисбатан тегишли тартибда интизомий жазо чоралари кўрилади», дейилади хабарда.

Таъкидланишича, айиқнинг териси шилиб олингани ҳақидаги фото ва хабар ҳақиқатга зид. Ижтимоий тармоқларда тарқалган суратнинг Чироқчи туманидаги воқеага алоқаси йўқ. Айни дамда ушбу ҳолат юзасидан ҳам ўрганиш ишлари олиб борилмоқда.