Италия пойтахти Римдан 60 километр узоқликдаги Ладисполи шаҳрида циркдан қочган шер қарийб етти соат деганда ушланди. La Repubblica нашрига кўра, Кимба лақабли кекса шер 11 ноябр куни цирк ишчилари очиқ қолдирган қафасдан чиқиб кетган.

Йиртқич шаҳар кўчалари бўйлаб кезган, маҳаллий аҳолидан эса уйларидан ташқарига чиқмай туриш сўралган. Ижтимоий тармоқларда шернинг шаҳарда уйлар ва машиналар орасида айланиб юргани акс этган видеолар пайдо бўлди. Уни қидириш ва қўлга олиш учун вертолёт ва тунги кўриш мосламаларидан фойдаланилган.

Арслон маҳаллий вақт билан соат 15:00 да биринчи марта қўлга олинган, аммо у яна қочиб кетган. 20:30 да эса ниҳоят махсус тинчлантирувчи воситалар ёрдамида ушланиб, 22:00 да полиция томонидан олиб кетилган.

Мазкур воқеа ёввойи ҳайвонларни тутқунликда сақлашга қарши фаолларнинг танқидларига сабаб бўлди.