Италиялик уч қиличбоз ўзбекистонлик 17 ёшли қиличбозлик чемпионини зўрлаганликда айбланмоқда. Бу ҳақда «TRT Russian» хабар берди.

Қайд этилишича, ҳодиса 2023 йилнинг 4-5 август кунлари Италиянинг Тоскана провинциясида содир бўлган, бироқ бу ҳақда Сиена полицияси ишга аралашганидан кейингина маълум бўлди. Терговчилар аниқлаганидек, зўрлаш Тоскананинг Чианциано Терме шаҳрида турли мамлакатлар спортчилари иштирок этган қиличбозлик бўйича машғулот вақтида содир бўлган. Ҳодиса иштирокчиларининг исмлари ошкор этилмаган.

Таъкидланишича, айбланувчиларнинг икки нафари ҳозирда тергов қилинмоқда, учинчиси вояга етмаган. Айбловларнинг жиддийлигига қарамай, Сиена прокуратураси дарҳол терговни бошламаган, бу эса кескин норозиликларга сабаб бўлган. Жабрланган қиличбознинг юридик вакили айбланаётган спортчиларга нисбатан чора кўрилмаганидан ҳафсаласи пир бўлганини ва гумонланувчиларга ҳеч қандай санкция ёки мусобақадан четлатиш жазоси қўйилмаганини таъкидлади. 

Иш авж ола бошлагач, Италия қиличбозлик федерацияси (ФИС) тергов билан ҳамкорлик қилишини ва иш судгача борса, фуқаровий даъвогар сифатида чиқишга тайёрлигини эълон қилди. Текширув натижалари спорт ташкилотларининг нотўғри хатти-ҳаракатлари ҳақидаги даъволарни ҳал қилиш услубида сезиларли ўзгаришларга олиб келиши мумкин.