Адлия вазирлигининг хабар беришича, «Ғиждувон шашлик» географик кўрсаткич сифатида давлат рўйхатидан ўтказилган.

Ўзбекистон Республикаси «Географик кўрсаткичлар тўғрисида»ги Қонунига кўра, товарни муайян географик объект ҳудудидан келиб чиққан товар сифатида идентификацияловчи белги географик кўрсаткич деб эътироф этилади ва бунда товарнинг сифати, ном қозонганлиги ёки бошқа хусусиятлари унинг географик жиҳатдан келиб чиқишига сезиларли даражада боғлиқ бўлади.

Адлия вазирлиги эса, географик кўрсаткичларни ҳуқуқий жиҳатдан муҳофаза қилиш соҳасидаги ваколатли давлат органи ҳисобланади. Бухоро вилоят адлия бошқармасининг кўмаги билан жорий йилнинг 24 август куни «Ғиждувон шашлик» географик кўрсаткич сифатида Адлия вазирлиги томонидан давлат рўйхатидан ўтказилган.

Бухоро вилоятида биринчи бўлиб давлат рўйхатидан ўтказилган ушбу географик кўрсаткичдан фойдаланиш ҳуқуқини тасдиқловчи гувоҳноманинг эгаси Ғиждувон туман ҳокимлиги ҳисобланади. Ҳокимликка гувоҳномада кўрсатилган товар турига нисбатан фойдаланиш ҳуқуқи берилади.

Мазкур географик кўрсаткич гувоҳномаси вилоят адлия бошқармаси бошлиғининг биринчи ўринбосари Ш.Б. томонидан давлат мустақиллигининг 32 йиллик байрами тадбирлари доирасида, Ғиждувон туман ҳокими Ш.Ашуровга тантанали равишда топширилди.

Ғиждувон туманининг амалдаги ҳокими Шерзод Ашуров 2021 йилнинг август ойида туман ҳокими этиб тайинланган. Ашуров ҳокимлик лавозимига келишдан олдин Бухоро вилояти давлат солиқ бошқармаси бошлиғи лавозимида хизмат кўрсатган.