Европарламент эълон қилган сўнгги резолюциясида Беларус президенти Александр Лукашенко Россия етакчиси Владимир Путиннинг Украинадаги ҳарбий жиноятларига шерик деб эълон қилинди. Бу ҳақда CNN хабар берди.

Қайд этилишича, 2023 йилнинг 13 сентябр куни қабул қилинган резолюция Беларус Шарқий Украинада йўл қўйилган ҳарбий жиноятларда Путин билан теппа-тенг жавобгар қилиб қўйган. Лукашенкога берилган бундай «мақом» Евромаконнинг Беларусга нисбатан тутадиган сиёсати яна кескин тус олишини англатиши мумкин.

«Россиянинг Украинага қарши асоссиз босқинчилик урушига йўл очиб, Лукашенко режими Россия томонидан содир этилган жиноятларга шерик бўлди. Бу Украинага етказилган вайронагарчилик ва зарар учун жавобгарликни назарда тутади», дейилади резолюцияда.

Европарламент баёнотига кўра, уруш тугаган ва унинг айбдорлари жавобгарликка тортилган тақдирда, хунрезликка йўл очган Россия раҳбарияти вакиллари билан бир қаторда Беларус ҳукумати вакиллари ҳам жиддий бадал тўлаши керак бўлади. Гарчи Беларус урушда расман иштирок этмаётган бўлса-да, унинг Россияни қўллаб-қувватлаши ва таъминоти кескин айблов эълон қилиш учун асос бўла олади.

Европарламент, шунингдек, Европа Иттифоқига аъзо давлатларни Россияга қарши санкциялар доирасини кенгайтириш ва кучайтиришга чақирган. Унда ҳозирда Россияга қарши қандай санкциялар қўлланилаётган бўлса, Беларусга нисбатан ҳам худди шундай санкциялар жорий этиш таклиф қилинган.

Парламент, шунингдек, Россия ва Беларусни «жиноий даромадларни легаллаштириш ва терроризмни молиялаштириш бўйича юқори хавфли учинчи томон давлатлар рўйхати»га киритишга чақирган.