Уч йилдан буён «Баркамол авлод» болалар мактабининг робототехника тўгараги аъзо бўлган Озодбек Ҳошимов одамларни газ, олов ва тутундан огоҳлантирувчи қурилмани яратган.

У Зангиота туманидаги 6-мактабнинг 9-синф ўқувчиси.

Озодбек одамларни ис газидан огоҳлантирувчи қурилмани ихтиро қилиш ғояси ўзида қандай туғилганини гапириб берди:

«Қиш мавсуми эди. Одамлар ис газидан вафот этди деган машъум хабарларни ОАВ орқали ўқиб, эшитганимда, бунинг олдини олиш керак деган ўй келди ва бунинг ортидан мана шу ихтирони яратиш ғояси туғилди. Агар ушбу ихтиро тегишли хизматлар билан интеграция қилинса, албатта бундай бахтсиз ҳодисаларнинг олди олинишига ишонаман», – деди Озодбек.

Қурилма ёнғин хавфи юзага келганда, уй эгаларини огоҳлантириш билан бирга ўт ўчирувчиларга хавф юзага келган жойдан геолокация ва СМС хабарнома юборади. Ҳозирда Озодбекнинг ихтиросини патентлаш жараёни кечмоқда.

Озодбекка ушбу ихтирони яратишда тўгарак раҳбари Камолиддин Абдуқаҳҳоров бошчилик қилган. 22 ёшда бўлган устоз 2019 йилдан буён Шайхонтоҳур туман «Баркамол авлод» болалар мактабида тўгаракка раҳбарлик қилади.

Аввалроқ, Ўзбекистон ва АҚШ олимлари вилт касаллигига чидамли янги пахта навини яратгани хабар қилинганди.