Bugun.uz маълумотларига кўра, Мактабгача ва мактаб таълими вазирлиги ҳузуридаги Мактабгача таълим агентлиги Давлат хусусий шерикчиликни ривожлантириш бўлими етакчи мутахассиси C.A. тадбиркорга Давлат-хусусий шерикчилигида боғча қуриш учун имтиёзли кредит олишига ёрдам беришини айтиб фирибгарлик жиноятини содир этган.

Биздаги мавжуд маълумотларга кўра, у хизмати эвазига ажратилган тадбиркордан кредитнинг 5 фоиз миқдорида ҳақ сўраган ва пулни таниши орқали бериб юборишни тайинлаган.

2023 йилнинг 7 сентябрда унинг таниши С.С тадбиркордан 50 миллион сўм миқдоридаги пулни олаётганида қўлга олинган.

Мазкур ҳолат юзасидан бўлиб ўтган суд мажлисида С.A. ушбу кредит маблағи Халқаро молия институти томонидан тақдим этилиши ва ҳужжатлар инглиз тилида тайёрланиши керак бўлганлиги учун ўзи таржима қилиб хизматига ҳақ олишни режа қилганини билдирган.

Шунингдек, суд мажлисида гувоҳ сифатида иштирок этган тадбиркор Ж.Д.нинг айтишича, кредит олмоқчи бўлиб юрганида C.A.. мактабгача таълим агентлиги халқаро жамғармаларни Ўзбекистонга молиялаштириб олиб кириш билан шуғулланишини, унинг гарант сифатида ўртада турган айрим мансабдорларига кредитнинг 5 фоизи миқдорида пул берилиши кераклигини айтган.

Тадбиркорнинг айтишича, унга араб давлатлари жамғармаларидан 2 миллиард 200 миллион сўм ажратилиши кўзда тутилган ва С.A.га 110 миллион сўм миқдорида пул беришига келишилган.

Суд С.А.ни фирибгарлик жиноятини содир этганликда айбли деб топган ва зарар суммаси йўқлиги, туман прокурори билан тузилган айбига иқрорлик келишувини инобатга олиб, унга нисбатан Жиноят Кодекснинг 57-моддаси (енгилроқ жазо тайинлаш) тартибида БҲМнинг 50 баробари миқдорида жарима жазоси тайинлаган.