Кеча, 8 сентябр куни кечқурун Марокашнинг Марракеш шаҳрида 6,8 магнитудали зилзила содир бўлгани ҳақида хабар берган эдик. Айни пайтга келиб табиий офат қурбонлари сони 632 нафарга етди. Бу ҳақда Al-Jazeera хабар берди.

Қайд этилишича, офатдан бир неча соат ўтиб, ҳалок бўлганлар сони 632 кишига етган, 329 киши эса жароҳат олган. Кўплаб давлат раҳбарлари Марокаш халқига ҳамдардлик билдирди. Хусусан, Украина президенти Владимир Зеленский ҳалок бўлганларнинг оилаларига ҳамдардлигини изҳор қилди.

«Биз қирол Муҳаммад VI ва барча марокашликларга Марракеш минтақасида содир бўлган даҳшатли зилзила оқибатида ҳалок бўлганлар учун чуқур ҳамдардлик билдирамиз. Жароҳатланганларга шифо тилайман. Украина ушбу фожиали вақтда Марокаш билан бирдам», – дейди у.

Туркия президенти Ражаб Тоййиб Эрдўғон эса ўзининг Х (Twitter) саҳифасида:

«Биз марокашлик биродарларимизни ушбу оғир соатда ҳар томонлама қўллаб-қувватлаймиз», деб ёзган.

Россия президенти Владимир Путин ҳам «дўст Марокаш халқи»нинг дарди ва мотамига шерик эканини билдирган.

Бундан ташқари Испания бош вазири Педро Санчес ва Франция президенти Эммануэл Макрон ҳам Марокаш халқи билан бирдамлигини маълум қилди.

Исроил эса Марокашдаги ҳалокат минтақасига катта қутқарув гуруҳини юборишга тайёрланмоқда. Мамлакат қутқарув ва биринчи ёрдам кўрсатувчи ходимларини Марракеш шаҳрига юборишга қарор қилган.

Халқаро Қизил хоч ва Қизил ярим ой жамиятлари ҳам 24 соатдан 28 соатгача бўлган муддатда «фавқулодда вазиятларда жавоб бериш гуруҳлари» деб номланган махсус ёрдам бўлинмаларини Марракешга жойлаштиришни режалаштирмоқда.