Telegram мессенжерида 11 март куни навбатдаги янгиланиш эълон қилинди. Бу ҳақда унинг расмий саҳифасида маълумот берилди.

Юкланмалар менежери

Маълум бўлишича, дастурга юкланмалар менежери қўшилган. Бу бир нечта файллар бирданига юклаб олинаётганда уларни бошқариш имконини беради: бундай вазиятда Қидирув панелида янги белги чиқади.
Юкланмаларни кўриш ва бошқариш учун белгини босиш ёки қидирувда «Юкланмалар» рукнига кириш керак бўлади. Менежер орқали юкланмаларнинг барчасини ёки улардан бирини тўхтатиб туриш, давом эттириш ва ҳатто бирортасига устуворлик бериш мумкин.

Медиани тартиблаш

Эндиликда мессенжер орқали бир нечта расм ёки видео юборишда уларнинг чатда қандай кўринишига қараб олиш ва танланган медиани қайта тартиблаш ёки олиб ташлаш мумкин бўлади. Бунинг учун панель юқорисидаги «Танланди: …» бандини босиш керак.

Шунингдек, iOS иловасида бириктирмалар менюси дизайни Android версиясига етиб олиши учун тўлиқ янгиланган.

Тунги режим

Тунги режимга ҳам бироз ўзгартириш киритилган: энди чат лентасини кўришда фон, стикерлар ва медиа ярим шаффоф интерфейс элементлари орқали нур таратишни бошлайди.

Аккаунтга кириш

Android ва МаcОС версияларида аккаунтга кириш жараёнига янги анимациялар жорий этилган ва тўлдирилган. Andriod фойдаланувчилари код киритаётганида рақамлар жойидан силжиётганини кўриши мумкин.

МаcОС учун эса QR код орқали кириш экрани «Матрица» фильмини эслатувчи анимациялар билан бойитилган.

Фойдаланувчини телефон рақами орқали топиш

Энди Telegram’да фойдаланувчиларни телефон рақами орқали топиш мумкин (аввал фақат телефон рақамини контактларга қўшиш орқали топиларди). Бунинг учун рақамни қидирув бўлимига халқаро форматда ёзиш керак. Масалан, t.me/+998987654321.

Табиийки, ҳавола махфийлик созламасида бошқаларга телефон рақамингиз орқали топиш имконини берганингиздагина ишлайди.

Бошқа иловалар билан жонли эфир

Яна бир янги функцияга кўра, жонли эфирда тасвир устига фойдали ахборот қўшиш, «OBS Studio» va «XSplit Broadcaster» каби стриминг воситалари билан жонли эфир қилиш мумкин.

Украина воқеалари ҳақида

Telegram жамоаси ўзининг янгиланиш ҳақидаги хабарида Украина воқеаларига ҳам муносабат билдирган:

«Telegram’нинг кўп миллатли жамоаси таркибида кўплаб украиналиклар бор. Биз Украинадаги можаро зудлик билан тугатилишини тилаймиз. Бундай нотинч кунларда Telegram одамларга муҳим ахборотлар — тасдиқланган расмий баёнотлардан тортиб тинч аҳолининг хавфсиз жойга ўтиши учун бериладиган ҳаво ҳужуми огоҳлантиришларигача етказишда ёрдам бермоқда. Ва бу бизга таскин беради. Бу урушдан жабрланганларнинг барчасига қалбимиз ачинади. Биз Telegram қамрови чекланган ҳудудлардаги одамларни ўзаро боғлаш ва хизмат кўрсатишдаги узилишларга дош бериш имкониятини яхшилашда давом этамиз», дейилади муносабатда.

Аввалроқ Telegram мессенжерида спойлерларни яшириш бўйича функция ишга туширилиши хабар қилинганди. Шунингдек, Telegram асосчиси Павел Дуров Украина воқеаларига муносабат билдирган.