Ижтимоий тармоқларда «метан заправка»ларда газ нархи 3800 сўмга кўтарилгани ҳақида хабарлар эълон қилинди. Энергетика вазирлиги ҳузуридаги «Ўзэнергоинспекция» ахборот хизмати ҳолат юзасидан муносабат билдирди.

Маълум қилинишича, бу ҳолат Фарғона шаҳридаги автомобилларга газ тўлдириш компрессор шохобчасида кузатилгани аниқланган.

«Ўзэнергоинспекция»нинг Фарғона вилоят ҳудудий бошқармаси ходимлари томонидан ушбу АГТКШ масъулларига тушунтириш ишлари ўтказилган ва «метан» газнинг 3350 сўмдан сотилиши таъминланган.

Бугун, шунингдек, Сурхондарё ва Андижон вилоятларида иккита АГТКШда шундай ҳолат кузатилган бўлиб, улар ҳам «Ўзэнергоинспекция»нинг ҳудудий бошқармалари томонидан бартараф этилган.

Вазирлар Маҳкамаси қарори билан автомобилларга газ тўлдириш компрессор шохобчаларида табиий газни сотишда унинг энг баланд чакана нархи 2024 йил 1 июнгача бир куб метр учун 3350 сўм қилиб белгиланган.

Агар АГТКШда табиий газ асоссиз равишда қиммат нархларда сотилаётганига гувоҳ бўлинса, қуйидаги манзилларга мурожаат қилиш сўралган:

• Бош прокуратуранинг телеграм боти @EnergonazoratBot ва ишонч телефонига 71-232-10-07;
• «Ўзэнергоинспекция»нинг телеграм боти @energoInspeksiya_bot ва ишонч телефонига 71-200-02-86;
• Рақобатни ривожлантириш ва истеъмолчилар ҳуқуқларини ҳимоя қилиш қўмитасининг ишонч телефонига 71-207-47-00.