Бош прокуратура ҳузурида ташкил этилган Мажбурий ижро бюроси фаолият бошлаганига етти йил тўлди. МИБ Ўзбекистон Республикаси Президентининг 2017 йилдаги ПФ-5059-сонли фармони асосида ташкил этилган. Адлия вазирлиги Суд департаментининг Ўзбекистон Республикасининг «Суд ҳужжатлари ва бошқа органлар ҳужжатларини ижро этиш тўғрисида»ги  қонуни ва бошқа қонун ҳужжатларида назарда тутилган вазифалари, функциялар юклатилган бюрода бугунга қадар 170,6 трлн сўмдан ортиқ ундирувлар амалга оширилган. Бу мос равишда 2023 йилги давлат бюджети даромадларининг 55 фоизга тенг суммасини ташкил этади.

Ўтган 7 йил МИБда:

• Ижтимоий аҳамиятга эга бўлган ижро ҳужжатлари бўйича «Темир дафтар», «Аёллар дафтари» ва «Ёшлар дафтари»га киритилган эҳтиёжманд фуқароларимизга 2,4 трлн. сўм миқдорида маблағлар ўтказиб берилган;
• Долзарб ва муаммоли бўлган алиментга оид ишлар бўйича – моддий ёрдамга муҳтож фарзандлар фойдасига 4,1 трлн. сўмлик маблағлар ундирилган;
• Қонунга хилоф равишда ишдан бўшатилган 4 902 нафар фуқаролар ишга тикланди ва уларга тўланмай қолган 290,7 млрд. сўмлик иш ҳақлари ундириб берилган;
• Ўтган даврда иш ҳажми оғирлиги сабабли, 1 800 нафардан ортиқ ходимлар тизимни тарк этишга мажбур бўлишди, 6 нафар ходим эса, хизмат этиш чоғида вафот этишган;
• Айни пайтда, бир нафар давлат ижрочиси ойига ўртача 180 дан зиёд ижро ҳужжатларини юритмоқда.

МИБдаги муаммолар

МИБ ўтган даврда  кўрсатган натижалари билан бирга бир қатор камчиликларга ҳам эга ташкилот сифатида ном қозонаётир.

Бу сўнгги пайтларда фуқароларнинг МИБ органлари билан боғлиқ норози кайфиятида намоён бўлмоқда. Ижтимоий тармоқларда Мажбурий ижро бюроси ходимларининг ҳаракатсизлиги оқибатида бажарилмай қолаётган ижро ишлари ҳақида чиқишлар кўпайиб қолди.  Қарз ва бошқа мажбурий ундирувларни ундиришда бюро ходимларининг чорасизлиги тизимни такомиллаштиришни тақозо этади. Биргина МИБ ходимига юкланган 180 дан ортиқ ижро ишлари бюро иш сифатига ва жамиятдаги мавқеига салбий таъсирини кўрсатаётгани сезилмоқда.

Bugun.uz таҳририяти Мажбурий ижро бюроси билан боғлиқ муаммоларга ҳукуматни эътиборли бўлишини сўраб, фуқароларнинг ҳақ-ҳуқуқларини таъминлашдаги сўнгги инстанциялардан бири сифатидаги мавқеини ушлаб қолинишига умид қилиб қолади.

Дилшод Ҳакимов тайёрлади.