Президент Шавкат Мирзиёев мактабларни иситиш учун коридорлардаги ойналарни ёпишни таклиф қилди. Бу ҳақда давлат раҳбари ўзининг Қашқадарёга ташрифи чоғида айтиб ўтган.

Давлат раҳбари шунингдек, мактабларнинг қурилиш стандартларини қайта кўриб чиқиш кераклигини таъкидлаган. Мирзиёев шу ернинг ўзида мутасаддиларга юзланиб, уларни саволга тутган.

«Санга савол бераман. Шу ерда қилинган қурилиш хатоларидан бири нима? Биласанми, бу ер ёзда иссиқ, қишда совуқ бўлади. Ман Самарқанд вилояти ҳокими бўлганимда мактабларда ҳамма ойналарни ёптирганман. Майли, битта қолсин. Шунча ойна бўлса иситиб бўладими!? Агар бу ойналар ёпилмаса бу ер умуман исимайди. Ҳар ерда биттадан ойна қолса бўлди. Шунда ёзда салқин, қишда иссиқ бўлади» деган Президент.

Эслатиб ўтамиз, аввалроқ Мирзиёев Қашқадарёда фермерларга кластерларни ихтиёрий танлашга имконият яратилишини айтганди. Шунингдек, давлат раҳбари воҳа аҳолисининг қарийб ярмида ортиқча вазн муаммоси борлигидан ташвишланганди. Бундан ташқари, Мирзиёев «Кун ўтса бўлди» қабилида иш тутадиган раҳбарлар – энг катта душманлигини таъкидлаганди.