Олдинроқ, Франция президенти Эммануэл Макрон расмий ташриф билан Ўзбекистонга келиши айтилиб, унинг ташрифи доирасида 1-2 ноябр кунлари Самарқандда кўплаб музокаралар бўлиб ўтиши режалаштирилганди. Шундан сўнг, кеча, 1 ноябр куни икки давлат раҳбари Самарқандда учрашиб, тунги шаҳарни сайр қилишганди. Бугун, 2 ноябр куни Самарқанд шаҳрида Франция етакчисини расмий кутиб олиш маросими бўлиб ўтган. Сўнг олий даражадаги музокаралар бошланган. Музокаралардан сўнг, икки давлат етакчилари Самарқанддаги Конгресс маркази боғида дарахт экишган. Кейин эса Ўзбекистоннинг маданий меросига бағишланган кўргазма билан танишишган. Сўнгра давлат раҳбарлари Француз алянсининг Самарқанд шаҳридаги филиалига ташриф буюриб, уни тантанали тарзда очиб беришган. Самарқанд шаҳридаги самарали Ўзбекистон-Франция саммити якунига етгач, Президент Мирзиёев аэропортда Франция президенти Эммануэл Макронни кузатиб қўйди.

Президент матбуот хизматининг хабарига кўра, шундан сўнг Президент Шавкат Мирзиёев Қозоғистон президенти Қосим-Жўмарт Тўқаевнинг таклифига биноан Туркий давлатлар ташкилоти саммитида иштирок этиш учун амалий ташриф билан Остона шаҳрига жўнаб кетган.

Давлат раҳбарини Қозоғистон бош вазири Алихан Смаилов Остона аэропортида кутиб олган.

Олдинроқ, Президент Мирзиёев Туркий давлатлар ташкилоти бош котиби Кубаничбек Омуралиев билан учрашганди.

Айтилишича, давлат раҳбарлари кенгашининг навбатдаги йиғилиши кун тартибидан ташкилот доирасидаги кўп томонлама ҳамкорликни, энг аввало, савдо-иқтисодиёт, инвестиция, транспорт-коммуникация, экология, маданий-гуманитар ва бошқа соҳаларда янада ривожлантириш масалалари ўрин олган.

Маълумот учун, бу галги Туркий давлатлар ташкилоти саммитига Ўзбекистон раислик қилмоқда.

Эслатиб ўтамиз, аввалроқ Макрон Ўзбекистоннинг ЖСТга аъзо бўлишини қўллаб-қувватлаганди. Сўнгра, Франция раҳбари Ўзбекистонга нима учун келгани ҳақида шахсий саҳифасида ўзбек тилида пост қолдирганди. Бундан ташқари, Макрон Қозоғистонга бориб, Тўқаев билан биргаликда ошиқ ўйнаганди.