Кеча, 23 октябр куни Президент Шавкат Мирзиёев ҳудудларда ичимлик суви таъминоти ва оқова сув тизимини яхшилаш, озиқ-овқат экинларини экиш масалалари бўйича йиғилиш ўтказди. Бу ҳақда Президент матбуот хизмати хабар берди.

Ушбу йиғилишда давлат раҳбари вилоят ҳокимларига ичимлик суви таннархини арзонлаштириш вазифасини қўйган. Бунда энг катта манба сув корхоналари ишлатадиган электрнинг бир қисмини «яшил энергия»га ўтказиш экани таъкидланган.

Шунингдек, эскирган ичимлик суви насосларини энергия тежамкорига алмаштириш зарурлиги айтилган. Сув бўйича лойиҳалар қийматини қайта кўриб чиқиш, уларда ишлатиладиган материалларни маҳаллийлаштириш имкониятлари кўрсатиб ўтилган. Соҳадаги янги лойиҳалар бундан буён бевосита жойларга чиқиб, аҳолининг фикри ва розилиги олинганидан кейин маҳаллий кенгашларда муҳокама қилиниши белгиланган. Лойиҳага қанча маблағ ажратилгани, пудратчиси қайси корхона экани, қачон ишга тушиши билан боғлиқ барча маълумотлар эълон қилиб борилиши айтилган.

Маълумот учун, бугунги кунда 1 куб метр ичимлик суви таннархи Тошкент шаҳрида 448 сўм бўлгани ҳолда Наманганда қарийб 3 минг сўмни, Самарқанд ва Навоийда 2 минг 600 сўмни ташкил қилади. Сув ишлаб чиқариш таннархида электр энергияси улуши республика бўйича ўртача 27 фоизга тенг. Лекин Фарғона, Наманган ва Тошкент вилоятларида бу кўрсаткич анча юқори.

Эслатиб ўтамиз, аввалроқ Президент Мирзиёев USAID администратори Саманта Пауэр бошчилигидаги делегацияни қабул қилгани ва ташкилот Ўзбекистон халқи учун 14 миллион доллардан ортиқ маблағ ажратишга қарор қилгани ҳақда хабар берган эдик.