Президент матбуот хизматининг хабар беришича, бугун, 21 ноябр куни Шавкат Мирзиёев Жанубий Корея Республикаси президенти Юн Сок Ёл билан телефон орқали мулоқот қилган.

Мулоқотда икки давлат ўртасидаги дўстлик ва алоҳида стратегик шериклик муносабатларини янада ривожлантириш ҳамда кўп қиррали ҳамкорликни кенгайтиришнинг долзарб масалалари кўриб чиқилган. Икки мамлакат етакчиларининг шу йилнинг cентябр ойида Ню-Йорк шаҳрида БМТ Бош ассамблеяси йиғилиши доирасида ўтган учрашувида эришилган келишувларни амалга оширишга алоҳида эътибор қаратилган.

Шунингдек, етакчи компанияларнинг кооперация лойиҳаларини жадаллаштириш ҳамда Жанубий Кореянинг банк-молия институтлари билан янги шериклик дастурини шакллантиришдан манфаатдорлик билдирилган. Бундан ташқари, Қўшма Ҳукуматлараро қўмитанинг навбатдаги йиғилишини жорий йил охиригача ўтказишга келишиб олинган.